竹塹地區舊地名探源-葉玉嬌學員

本文心得為新竹腔客語文稿：

吾從十年前就熟悉范教授，感受著范老師个為人係非常有修養、善良个。佢對做學問个態度摎教學个生動活潑方式，分來上課个學員緊上緊試著有趣味性。范老師在上課个情形，佢用靈巧思考引導个方式來進行，分來上課學習个學員能夠用自家思考个模式來回答范老師所提出來个問題。像班上有不同族群个人：有福佬人、廣東人、客家人。范老師上課大體使用新竹腔个客話來講課，成時也會講兜苗栗腔个客話來做比較聲母、韻母、聲調。係有堵著學員聽毋識个新竹腔客話，先生會用華語（普通話）來做說明，毋會分上課个學員感覺著盡困難。

這學期所開个係「竹塹地區舊地名探源」，這係范老師自家所研究摎做田野調查記錄分析、比較。逐擺上課个內容就係范老師自家用手寫个手稿，講課个內容又精彩又豐富，包涵范老師个生動表情摎肢體語言。

范老師這學期準備了日本時代大正年个老地圖分學員帶轉屋下做研究，在上課个時節有講著个老地名，就請學員尋出來做比對。范老師分來上課个學員當好个做學問觀念，就係毋但淨愛瞭解這隻地方个老地名，還愛去做思考這隻位所个地理環境、特有个植物、人文歷史，更加愛去做多方面个比較。尋出文獻、縣鄉誌、專書个閱讀，這係一種對學問負責个態度。這種恁好个做學問習慣，恩俚做學生个愛學習起來，這係范老師當好个一種模範行為。